Tripura chief minis-ter Biplab Kumar Deb chuan an state-in Dubai-a a thawnchhuah tur, lakhuihthei leh nimbu ton 17 chu Thawhṭanni khan a vailiam. 

Tripura hian nikum khan lakhuihthei, Queen variety chu Dubai-ah hian ton 1.5 a lo thawnchhuak tawh bawk a ni. 

Chief minister chuan kum 2021-ah an state-in lakhuihthei a tharchhuah chu ton nuai 1.26 aṭang­in ton nuai 3-ah a pung thei dawn tih a sawi a, India ram chhung state zawng zawng bakah rampawn lamah pawh tam zawka thawnchhuah a ni dawn tih a sawi. 

CM chuan lakhuihthei leh nimbu an thawnchhuah chu ni 9-10 hnuah Dubai a thleng dawn tih a sawi a, Bangladesh nena waterway hmanna tura rawtna siam mek chu hman a nih theih hunah chuan hun hman hi a rei loh zawk bakah, a thawnchhuahna senso pawh a hniam thei zawk dawn tih a sawi a ni. 

Deb chuan an state-a lakhuih­thei Queen variety thar chhuah chu 25% zetin a pung tih a sawi a, lakhuihthei chinna ram pawh zauh zel turin a chah bawk. "Hun rei loteah kan state chuan sum tam zawk lalutin, loneitute pawhin hamṭhatna tam tak an hmu thei dawn a ni," a ti. Prime minister Narendra Modi-a'n kum 2020-ah loneitute sum lakluh a leta tihpun a tumna chu Tripura-ah chuan lakhuihthei thawnchhuah hmangin a hlawhtlinna hmuh a ni dawn tih a sawi.  Lakhuihthei hi Dubai bakah Bangladesh-ah pawh an thawnchhuak tel tawh. 

Agriculture and transport minister Pranajit Singh Roy chuan lakhuihthei chu state chhungah pum khat Rs 5-10 a nih laiin, ram pawn lama thawnchhuah chu pum khat Rs 15 anga pek a nih thu a  sawi. 

Tripura chief secretary Usuru­pati Venkateswarlu chuan Tripura lakhuihthei thlum tui tak chuan khawvel hriatah Tripura chu a phochhuak dawn a ni, a ti. Tripura lakhuihthei chu Israel leh Bahrain bakah ramdang eng emaw zatin lakluh an duh thu pawh an sawi tawh tih horticulture department official chuan a sawi bawk. 

Share this Post