Nagaland chief mi­nister Neiphiu Rio chuan Register of Indigenous Inhabitants of Nagaland (RIIN) kalpui laiin, Naga ni lote chu tihduhdah an ni dawn lo, a ti.

Inrinni khan Neiphiu Rio hian non-Naga co­mmu­nity aiawhte mee­ting a neihpui a, hetah hian dan loa awmte zawnchhuah an nih loh chuan sumdawnna hmun­pui, Dimapur chu a pangngai rengin a awm thei dawn lo tih a sawi. RIIN chuan khua leh tuite chu a hum dawn a, Naga ni lote pawhin harsatna an tawk lo ang, a ti bawk.

Meeting-ah hian Assamese, Agarwal, Brah­min, Bengali, Bihari, Gorkha, Sikh, Jain, Meitei leh Muslim community aiawhte an tel a ni.

Nagaland sorkar hian June 29 khan hriattirna tichhuakin, December 1, 1963 hma lama an state chhunga awmte chu RIIN certificate pek an nih dawn thu an tarlang.

Hei hi pawl hrang hrangin a tir chuan an dodal a, mahse kar liam ta Nilaini khan sorkar hian tribal pawl leh civil society-te chu meeting a neihpui a, anni pawh hian a thuphung chuan an pawmpui phawt a ni.

Nagaland-ah han ILP hman ni mah se, Dimapur bikah hian ILP neih kher a ngai lo a, hemi a nih avang hian Dimapur leh a chhehvelah hian Naga ni lote an fuankhawm nasa hle. 

Share this Post