Amit Shah-a'n hmarchhak CM leh governor-te hmu dawn

Union home minister Amit Shah chuan August 3-4 hian hmarchhak state pariat chief minister leh governor-te a hmu dawn a, security dinhmun leh hmasawnna hna thawh hrang hrangte a sawipui ang. 

Shah hian Guwahati-a North Eastern Council (NEC) plenary meeting neih hunah chief minister leh governor-te hi a hmu dawn a ni. NEC-ah hian hmarchhak state pariat chief minister leh governor-te hi member an ni.

NEC hi July, 2018 khan a kalphung siamṭhat a ni a; chairman atan Home Minister leh vice chairman atan DoNER minister-te dah an ni. North Eastern Council Act, 1971 hmanga din NEC hi, a tirah chuan hmarchhak state pasarih - Assam, Meghalaya, Arunachal Pradesh, Nagaland, Manipur, Mizoram leh Tripura an tel. Mahse kum 2002, December thla khan NEC Act hi siamṭhat a ni a, Sikkim chu member pariatna atan telh a ni ve leh. 

Hmarchhak biala inkalpawhna leh inthlunzawmna ṭha siam chu NEC hian a ngai pawimawh ber a, state hrang hrangten inkalpawhna ṭha an neihna tur pawhin a thawhhlawk hle. NEC funding hnuaiah hian kawngpui km. 10,911 a thui siam a ni tawh a, kawngpui siamte hi an awmna state-te enkawl zuina tura dah an ni. 



Share this Post

Login to comment
No Comments